بقلم " بلال فضل"

اضرب يا سيسي.. افرم يا سيسي.. فوضناك عشان تخلصنا منهم يا أسد.
ــ بس يا جماعة الموضوع مش بالسهولة دي.. زي ما تستخدم القوة مع الإرهابيين وحاملي السلاح لازم يبقى في حفاظ على حق التعبير السلمي وحل سياسي شامل وخطة ذكية ونفس طويل ومفاوضات ووسطاء وتلعب على ناس ضد ناس وإعلام بدل ما يبقى غشيم ويأدي إلى إن ناس كتير تضم على المعتصمين يعرف إزاي يقلل عددهم ويطمنهم من مخاوف رجوع القمع تاني.
● بس بقى قرفتونا كفاية حلول وسط بقى.. كفاية بقى رجعتونا ورا.. سيبونا ننضف مصر من الإخوان مصر مافاقتش إلا لما خلصت منهم في الخمسينات.
ــ على فكرة مصر ما خلصتش منهم في الخمسينات.. مصر سجنت ناس منهم وقتلت ناس ونفت ناس.. حاجة كده زي الست اللي عندها تراب موسخ الشقة فكنسته تحت السجادة عشان البيت يبان نضيف قدام الضيوف.
● بس بقى ملعون أبوكو على أبو شغل حقوق الإنسان بتاعكو.. ارحمونا.. بس شفت السيسي عامل إزاي زي عبد الناصر.. الله عليك ياسيسي.. افرم ياسيسي.
ــ بس عبد الناصر زي ماكان ليه حسناته كان ليه عيوبه.. نسيتو هزيمة خمسة يونيو..نسيتو انتهاك كرامة الإنسان والإعلام الكذاب والمغامرات العسكرية اللي ودتنا في داهية ولا خلتنا نتهنا بتنمية ولا نحقق تقدم.. نسيتو أهل الثقة اللي خربوا البلد وملوها فساد.. نسيتو انه زي مافرم الإخوان فرم الشيوعيين والليبراليين وكل واحد صاحب رأي حر وده اللي جابنا ورا.
● عمر السيسي ما هيبقى عبد الناصر هيستفيد من تجربته وبعدين ياسيدي ما تقلقش الشعب هيدافع عن حقوقه.
ــ مش انت اللي بتشبهه بعبد الناصر.. أنا بس بافكرك.. وبعدين انت ناسي إن الشعب المصري قبل 54 كان كله مسيس ودايما في مظاهرات وبعدين سكت وادى تفويض للحاكم الفرد فوصلنا للي وصلنا ليه.. وعشان كده لازم الواحد بس ياخد باله.
● يا أخي اتبطوا بقى وبطلوا تبشروا في وشنا.. إحنا ما صدقنا جه للشعب ده زعيم بطل وطني طالع من وسطيه بعد فشلكو.
ــ ماهو حكاية الزعيم دي مش دايما حاجة حلوة.. وبعدين عبد الناصر كان حواليه هيكل واحسان وفتحي رضوان ومصطفى أمين وعقول ممكن أعدها من هنا لبكره.
● والسيسي حواليه ناس زي الفل البرادعي وحسام عيسى والببلاوي وكمال أبو عيطه.
ــ ما هو المفروض إن دول أحرار وأصحاب رأي مستقل هل هيستحمل دايما رأيهم المستقل هو ده الرهان.
● ياعم حرام عليكو بقى الراجل مش عايز يبقى زعيم أصلا كل الحكاية بيلعب دور وطني لمصلحة شعبه.
ــ ياسيدي انت اللي قلت إنه زعيم وعشان كده رديت عليك.
● أيوه بس هو هيقضي على الإرهاب وبعد كده الشعب يختار اللي هو عايزه.
ــ لا كده تمام.. بس قولي هو هيقضي على الإرهاب ولا هيقضي على الإخوان.
● وهما الإتنين مش حاجة واحدة.. إيه انت خلية اخوانية نائمة.
ــ ماشي ياعم الله يسامحك.. فينا من شتيمة الأم برضه.. أنا بس عايز أقولك إن في العالم كله في فرق بين الإرهابي وبين اللي عنده أفكار إرهابية.. وكل واحد ليه طريقة تعامل وليه عقوبة.. صدقني الموضوع مش بالبساطة دي حتى لو كنت بتتعامل مع ناس يبان الخلاص منهم بسيط جدا.. مواجهة الإرهاب لازم يبقى ليها حلول سياسية وخطة متكاملة مش بس شغل أمن خلاص.. شوف أي حتة في العالم حصل فيها صراع سياسي تحول لإرهاب بعد كده.. مهما طال الوقت لازم الكل يقعد على الترابيزة بعد كده.. شوف أيرلندا كولومبيا تشيلي جواتيمالا نيكاراجوا كمبوديا.. هاعد لك إيه ولا إيه.. في الآخر لازم رجل الأمن يضرب والسياسي يلاقي.
● أيوه بقى دخلونا في شغل التوهان عشان نتلخبط منكو وتحرمونا من فرصتنا إننا نقضي على الإخوان للأبد.
ــ طيب خلاص خلاص اللي تشوفوه اعملوه بس الموضوع مش سهل على فكرة.
● ياعم ممكن تسكت بقى وتسيب قواتنا المسلحة تشتغل وتفرم الناس دي.. صدقني يابني مش مضيعك غير طيبتك.. البلد دي مش هتنضف إلا لما نخلص من الجماعة الإرهابية دي.. ده احتلال ومصر اتحررت منه.
ــ على فكرة كل ما تحدد مصطلحاتك صح كلما تنجز صح.. الاحتلال ونخلص ونبيدهم ونفشخهم.. دي كلها حاجات بترفع سقف توقعاتك وفي الآخر الواقع بيبقى ليه كلام تاني.. قول مثلا لازم نقبض على قيادات الجماعة.. لنحاصرهم في اعتصام رابعة لغاية ما يزهقوا.. لنرفع دعوى قضائية تحل الجماعة.. نحاصر أموالهم.
● لا بقى خلينا نبني على نضافة مرة واحدة.. لازم كلهم يتخيطوا واللي يفتح بقه فيهم يتضرب بالجزمة هما والسلفيين وكل الجماعات الإسلامية كله لازم يتحل ويسكتوا بقى وياكلوا عيش ويبطلوا شغل سياسة أو يخشوا معتقلات بقى ويسيبونا نشوف حالنا.
ــ بس ده كده إرهاب دولة.
● يوووه بقى ما قلنا احنا في حالة حرب.
ــ طيب خلاص خلاص. بس على فكرة هو مش لازم يكون عندك قوات جيش وشرطة مدربة على الإرهاب خاصة إن الموضوع كده هيطول وكل ما انت تقتل حد أو تسجنه هتربي عداوة مع الدايرة بتاعته وهتزود عدد أعداءك الفعليين وأعداءك المحتملين.
● والنبي بطلوا فتي بقى وسيبوا الناس تشتغل.. إحنا فوضنا الأمر كله لجيشنا وشرطتنا.
ــ بس مش لازم تقول رأيك في أداءهم عشان تضمن انهم هيشتغلوا صح.
● ماهو احنا عايزين نبطل حكاية الرأي الكتير دي عشان جابتنا ورا.
ــ تمام تمام بالتوفيق بإذن الله.. أنا عن نفسي مش هاكره والله خالص.. ياسلام كده الواحد يصحى ما يلاقيش لا إخوان ولا سلفيين ولا افكار متخلفة ومصر تبقى حتة من أوروبا.. الله ده حلم جميل.
● اتريق اتريق .
ــ لا والله باتكلم من قلبي.. ودي آخر حاجة هاقولها لإني بصراحة ما ليش في جو افرم يا سيسي والإبادة والاحتلال.. متخلف بقى. يالله سلام
(افرم ياسيسي اضرب يا سيسي.. كام واحد اتقتلوا.. أحسن ماهما اللي يستاهلوا.. إيه اللي وداهم هناك.. تلاقيهم هم اللي قاتلين بعض.. بيبالغوا لا يمكن تكون دي هي الأرقام.. ياحوول الله ضربوا نار وقتلوا كام.. كلاب ارهابيين.. إيه ده تفجيرين.. يا ولاد الكلب.. هه قتلنا كام واحد منهم.. الله افرم ياسيسي .. ياريتهم اتقتلوا كلهم.. ماهم برضه ولاد كلب بيصدروا أطفال ونسوان.. أحسن يستاهلوا.. إيه ده قتلوا أطفال ياولاد الكلب ياعصابة وسخة.. كام ضابط وعسكري اتقتلوا واتصابوا.. يانهار إسود.. إزاي ده يحصل مش المفروض مدربين على كده.. بس يالله كده خلصت خشوا بقى وخلصونا.. إعدامات.. إيه بقى.. هي الناس دي ما بتخلصش.. ده الدم بيكيفهم.. وفلوس بالهبل.. بس مصر أكبر منهم.. اضرب ياسيسي افرم ياسيسي.. هو احنا هنفضل عايشين على طول كده.. مش معقول كده.. هي الحكومة دي أصلا زفت وضعيفة.. ومحمد ابراهيم ده لازم يمشي.. السيسي لازم يمسك الحكومة بنفسه.. افرم ياسيسي.. هو احنا هنفضل كل يوم في القرف ده.. دي مش عيشة.. لا ياعم مين اللي قالك إن في مفاوضات.. ده شغل ناس وسخة والعالم المتلونة دي.. لا تفاوض مع الإرهاب.. لازم كلهم يتبادوا.. افرم ياسيسي.. إيه ده بجد.. هم جايز بس عايزين يشقوا صفهم ويلخبطوهم.. أصل برضه مواجهة الإرهاب لازم يبقى ليها حلول سياسية وخطة متكاملة مش بس شغل أمن خلاص.. شوف أي حتة في العالم حصل فيها صراع سياسي تحول لإرهاب بعد كده.. مهما طال الوقت لازم الكل يقعد على الترابيزة بعد كده.. شوف أيرلندا كولومبيا تشيلي جواتيمالا نيكاراجوا كمبوديا.. هاعد لك إيه ولا إيه.. في الآخر لازم واحد يضرب والتاني يلاقي.. فاوض ياسيسي واضرب ياسيسي.. ربنا معاك يا أسد.. ماسسسر ربنا يحفظ ماسسسر.. وبعدين بقى مش هنخلص ياجماعة.. الواحد يهاجر ويسيب البلد دي ولا إيه.. احنا اتخنقنا بصراحة من أم الفشل ده.. طيب أنا هاسكت ياعم وماليش دعوة واللي يحصل يحصل.. ربنا يسترها على مصر).