ثلاثه يوليو
تلاته يوليو يااهل الله
كان يوم ميلادى
اليوم ده عند الناس
بيعدى عادى
ابويا قالها خلفتى
واسعد ولادى
وامى نامت من التعب
وايدها تدادى
واخويا بصباعه فعنيا
واهو برضه عادى

كان العذاب يا اهل الله
عارف ميعادى
الطفل يصرخ بس انا
عليه بنادى

الناس تجيلها شكشكه
وانا جالى برد
يتيمتعوا كده بالهوا
وانا اشد شد
اتارى بختى فالحياه
ما شافوا حد

كبرت وكبرت علتى
زاد العذاب
وانا حزين على والدتى
عيشه هباب
الصبح شايله شنطتى
فيها كام كتاب
ادخل انا لحصتى ووالدتى
واقفه عالباب
طلعت الاول فى كله
الا الحساب

العمر عدى وكل حلو
فيها شاب
وانا من نجاح لنجاح
يفرح الاحباب

طينها واحد بلطجى
منه لله
قفلنا باب الهوى
سرق الحياه
شافنى اخويا باتقتل
بايديه معاه
قاله تسلم الايادى
وسابنى اقول اه

انا روحى طلعت هنا
والجسد لسه موجود
لاقيت بساط الهنا
لاخر الطريق ممدود
على اليمين رضا ربنا
على الشمال بورود
بعد تعاستى فالحياه
بقيت هنا مسعود
منا الشهيد يادى الهنا
والكل كانوا شهود

رجعت تانى لبطن امى
والبطن راحه
لاقيت عطور من الجنه
بريحه فواحه
والله حاسس بانى
واخدها انا سياحه
جانى ملايكه وقالوا
ترجع هنا تانى
ارجع لفين وانا شايف
فالجنه بستانى
كفى الشمال توب حمزه
وكتابى فالتانى
هنو يا ناس ابويا وامى
منا ربنى هنانى
اما اخويا انا مسامحه
منا سايبه وحدانى
برد يارب نار الفراق
لو افتكرنى يوم تانى

وانت يابويا ويا امى
نبينا الشفيع موجود
يوم الحساب فالجنه
واقفلكم بورود
ده وعد من ربنا
نجم الشهيد فصعود